குதிகால் வெடிப்பு அதிகமாகாம தடுப்பது எப்படி?

நம் பாதங்களில் இருக்கும் பகுதிகளில் குதிகால் பகுதி தான் அதிக அழுத்தத்தை தாங்குகிறது. இதனால் தான் அதிகமாக நடப்பது, நின்று கொண்டே இருப்பது போன்ற விஷயங்களால் நிறைய பேர் பாத வெடிப்பை சந்திக்கின்றனர். இந்த குதிகால் வெடிப்பு எந்த காரணத்தினால் உண்டாகிறது. மேலும் அதற்கு எப்படியெல்லாம் சிகிச்சை செய்யலாம் என அறிந்து கொள்வோம்.

உடலை தாங்கி பிடிக்கும் கால்களை அழகாக வைத்திருக்க வேண்டும். இது ஆரோக்கியம் சார்ந்த விஷயமும் கூட. குதிகால் வெடிப்பு பிரச்சனையை சந்தித்துவிட்டால் பாதத்தில் வலியும் உபாதையும் சற்று அதிகமாகவே இருக்கும்.
குதிகால் வெடிப்பு வரும் போது ஆரம்பத்திலேயே அதை சரிசெய்ய வேண்டும் இல்லையெனில் அவை அதிகமாகி கால்களை அசிங்கமாக்கிவிடும். ஆரோக்கியத்தையும் குலைத்துவிடும். குதிகால் வெடிப்பு சாதாரண கைவைத்தியத்தின் மூலமே விரைவில் சரிசெய்ய முடியும். அப்படி செய்ய வேண்டியவை என்னென்ன என்பது குறித்து தெரிந்துகொள்வோம்.

வேப்பிலை நீர்

குதிகால் வெடிப்பு, சேற்றுப்புண், விரலிடுக்கில் பூஞ்சை தொற்று எல்லாமே கிருமிகளால் வரக்கூடியதே. முதலில் பாதங்களிலிருந்து கிருமிகளை அகற்ற வேண்டும். குதிகால் வெடிப்பின் ஆழத்தை பொறுத்து கிருமிகளையும் வெளியேற்ற முடிவு செய்யவேண்டும்,

இந்த பராமரிப்பை காலை நேரம் தவிர்த்து மாலை அல்லது ஓய்வாக இருக்கும் நேரங்களில் செய்ய வேண்டும்.

தேவை

வேப்பிலை- 3 கைப்பிடி அளவு

தண்ணீர் – 2 லிட்டர்

ஸ்க்ரப் பிரஷ் ,

தண்ணீரை கொதிக்க வைத்து வேப்பிலையை போட்டு நன்றாக கொதிக்க விடவும். வேப்பிலையின் எசென்ஸ் முழுவதும் நீரில் இறங்கி இருக்கும். அதை அப்படியே இறக்கி சூட்டை ஆறவிடவும். மிதமான சூட்டில் கால் பொறுக்கும் சூட்டில் இருந்ததும் அகலமான பேஷனில் ஊற்றி கால்களை அதில் நனைத்தபடி வைக்கவும்.

10 நிமிடங்கள் குறையாமல் கால்கள் வேப்பிலை நீரில் இருக்க வேண்டும். அப்போது பொறுமையாக ஸ்க்ரப் பிரஷ் கொண்டு பாதங்களை மென்மையாக தேய்த்து எடுக்கவும். 10 லிருந்து 20 நிமிடங்கள் வரை இரண்டு கால்களையும் பொறுமையாக தேய்த்து எடுத்து பிறகு மெல்லிய சுத்தமான துணியில் பாதங்களை துடைத்து இலேசாக ஆலிவ் ஆயில் போட வேண்டும்.

கல் உப்பும் மஞ்சள் தூளும்

மஞ்சள் தூள் சிறந்த கிருமி நாசினி என்பது தெரியும். அதே போன்று கல் உப்பும் கிருமிகளை நீக்குகிறது. மேலும் இவை பாதத்தை பளிச்சென்று ஆக்கவும் செய்யும்.

தேவை

கல் உப்பு- 1 தேக்கரண்டி

மஞ்சள் தூள் – 3 டீஸ்பூன்

தண்ணீர் தேவைக்கு –

கல் உப்பை நுணுக்கி மஞ்சள் தூள் சேர்த்து பேஸ்ட் போல் குழைத்து சிறிதளவு எடுத்து வெடிப்பு இருக்கும் பகுதிகளில் தடவிகொள்ளுங்கள். தண்ணீரை கொதிக்க வைத்து மீதியிருக்கும் கல் உப்பு, மஞ்சள் தூள் சேர்த்து அடுப்பை அணைத்து ஆறவிடுங்கள். மிதமான சூட்டுக்கு வந்ததும் இப்போது குதிகால் வெடிப்பு நீரில் மூழ்கியிருக்கும்படி வைத்து கைகளால் மென்மையாக தேயுங்கள். ஏற்கனவே வெடிப்பின் மீது உப்பு மஞ்சள் தூள் கலந்த கலவை தடவியிருந்தாலும் வெடிப்பின் உள்ளே இருக்கும் கிருமிகளை வெளியேற்ற மஞ்சள் நீர் உள்ளே செல்ல வேண்டும். அதனால் பாதத்தை மெதுவாக அந்த நீரை கொண்டு மசாஜ் செய்தபடி தேய்த்து கழுவ வேண்டும். இந்த நீரை கொண்டு பாதத்தை கழுவிய பிறகு பாதத்தை உலரவைத்தாலே போதும். எண்ணெய் தடவ வேண்டாம். அப்போதுதான் கிருமிகளின் தாக்கத்தை மஞ்சள் முற்றிலும் நீக்கும்.

​அழுக்குகள் நீங்க கடலைமாவு

பெண்களுக்கு இருக்கும் பெரிய பிரச்சினை குதிகால் வெடிப்பு தான். குதிகால் வெடிப்பு காலின் அழகைக் கெடுப்பதோடு பல சமயங்களில் நமக்கு வலியையும் ஏற்படுத்துகிறது.

இது அப்படியே வளர்ச்சி அடைந்து செல்லுலாய்டிஸை உண்டாக்குகிறது. குதிகாலில் உள்ள சருமம் வறண்டு போகும் போது அதில் வெடிப்புகள் உருவாகின்றன.

அதே மாதிரி நாம் நடக்கும் போது குதிகால் பகுதி அதிக அழுத்தத்தை சந்திக்கிறது. இதனால் அதிக அழுத்தம் உண்டாகி அந்த சருமம் தடினமாகி குதிகால் வெடிப்பை ஏற்படுத்துகிறது.

இந்த பிளவுகள் ஆழமாக போகும் போது தான் நமக்கு வலியை ஏற்படுத்துகிறது.

குதிகால் வெடிப்பு என்று சொன்னாலும் வெடிப்புக்குள் உள்பகுதியில் அழுக்குகள் படிந்து கறைபோன்று கருப்பாக இருக்கும். அவை கால் பாதங்களின் அழகை கெடுத்து காண்பிக்கும்.

இரவு நேரத்தில் கால்களை சுத்தமான நீரில் கழுவி குதிகால் வெடிப்பின் மீது ஃபேக் போடலாம்.

தேவை

கடலை மாவு – 3 டீஸ்பூன்

கற்றாழை சாறு- 3 டீஸ்பூன்

எலுமிச்சை சாறு – 1 டீஸ்பூன்

மூன்றையும் சேர்த்து நன்றாக பேஸ்ட் போல் குழைத்து கொள்ளவும். இதை பாதங்கள் முழுவதும் நன்றாக தடவ வேண்டும். இயன்றால் இலேசாக ஸ்கரப் செய்வது போல் தடவவேண்டும். அவை நன்றாக காயும் வரை விட்டு மிதமான வெந்நீரில் தேய்த்து கழுவ வேண்டும். பிறகு சுத்தமான தேங்காய் எண்ணெய் அல்லது வைட்டமின் இ ஆயில் கொண்டு நன்றாக மசாஜ் செய்ய வேண்டும். இவை பாதங்கள் வெடிப்பினால் வறட்சி அடைவதை தடுத்து அழகாக வைக்க உதவும்.